Piyknie Wos witóm i jeszcze piyknij dziynkuja Wóm za wszystkie listy. Niy wszystko moga wydrukować, bo tu tela placu niy móm, a tyż i niykiere wice sóm bardzo „masne”.
Jo se je tam rod poczytóm i pośmieja sie, bo niy wszystkie znóm, ale w gazecie ich pisać niy idzie, bo by sie jeszcze móg ftoś uobrazić. Panu Pawłowi z Bytómia dziynkuja za wierszyk i chca pedzieć, że wcale mie niy nerwuje swoimi listami – bardzo mie uone radujóm. Móm zaległości w wysyłaniu podarków, co mi jedna Czytelniczka wypómniała, ale czasym niy poradza ze wszystkim nadónżyć. Prosza uo ciyrpliwość, bo co uobiecane, to zrobióne bydzie. A terozki jo sie biera za robota.
