Hanysy i Gorole łączcie się w uśmiechu! (4)

Witóm Wos piyknie i ciesza sie, że zaś moga to zrobić, bo to znaczy, że jeszcze żyja.

Pytajóm sie mie czasym, po jakiemu taki tytuł żech se uobroł do tyj rubryki. Tóż już Wóm to klaruja: po piyrsze, bo lubia jak je zgoda miyndzy ludziami, a niy zwada zkuli tego, na kierym placu fto sie urodził.

Jo wiym, że jak świat światym, to chłopczyska zawsze zkiż tego prali sie po dziubach, ale fto móndrzejszy, to mu to gibko przechodziło. Terozki sie pieróm zkuli kibicowanio fusbalistóm. To je jeszcze wiynkszo gupota. Ino że – jak padali starka – „z gupim niy pogodosz”, uón zawsze bydzie wszystko wiedzioł lepiyj. A takie wadzynie sie, to je dobre ino dlo błoznów – jak na filmie uo Kargulach i Pawlakach. Choć jak tak po ludziach patrza, a przeważnie po tych uod polityki, to se myśla, że niykierzi bez niyprzyjociela i chaje żyć niy poradzóm.

I tu dochodza do: „po drugie”. Tóż po drugie namowióm ludzi coby sie uśmiychali, bo jak sie ftoś do Wos uośmieje, to niy pasuje sie z nim wadzić. Choć sóm wyjóntki; jedyn sie uośmioł do kobiyty i dostoł po pysku uod jeji chłopa. Trza sie tak śmioć, żeby to było „do” a niy „z” kogoś, coby niy nachytać. Jo wiym, że sóm tyż tacy, kierzi z uśmiychym uogolóm Wos do gołyj skóry, abo nóż ze zadku wrażóm, ale jo tu niy godóm uo zasadach „walki politycznyj”, ani uo „strategii w interesach”, ino uo normalnym życiu.

Zatem: Hanysy i Gorole łączcie się w uśmiechu, bo z uśmiechem łatwiej przejść przez najgorsze zrządzenia losu, a Śląsk przez ostatnie tysiąclecie łączył ludzi z różnych stron i dzięki temu był jedną z najbogatszych pod każdym względem europejskich krain, o którą bili się książęta, królowie i cesarze. Nie przeszkadzałoby mi to, gdyby znów tak było. Może tym tytułem robię malutki kroczek ku temu? Kto wie...