fot: Fortum
Fortum jest fińskim koncernem energetycznym - jednym z największych producentów i dystrybutorów energii elektrycznej w krajach nordyckich
fot: Fortum
Spółka Fortum w ciekawy sposób podeszła do problemu walki z niską emisją. Do odbiorców ciepła na Górnym Śląsku skierowała list w...języku śląskim. "Sztrom i hajcong bez marasu dlo Bytomioˮ - czytamy w tekście.
"O co loto?
Skuli hajcowanio wonglym we chałpach, momy zamaraszony luft do dychanio, co niy ma dobre dlo zdrowotności ludzi ze Bytomio i inkszych miastow. Ekszperty badły i sie okozało, co 67 proc. bytomian niy kapuje co to je ta nisko emisjo. Praje poła bytomianow (46 proc.) hajcuje w doma wonglym. Na piynć bytomianow yno jedyn rozumi a godo, co skiż hajcowanio wonglym je we Bytomiu zamaraszony luft. Ekszperty porachowały, co łod zamaraszonego luftu we kożdym roku momy we Polsce o kole 45 tys. umrzikow wiyncyj. Nisko emisjo momy nojgorszo na połedniu Polski, a nojbardzij an Dolnym Ślonsku i Gornym Ślonsku. Juzaś we raji 10 miastow we Europie, kaj luft je nojbardzij zamaraszony, to znojdymy aże sześć polskim miastow: Krakow, Nowy Sącz, Glywice, Zobrze, Sosnowiec i Katowice.
Zawiyranie we chałpach takich małych fitulityn- hajcowniow, a prziłonczanie tych chałpow do hajcownianych lajtongow - poradzi drapko zmyńszać take zamaraszanie naszego luftu. Bo take grzonie chałpow ze rułow wreci sie niy yno we pijondzach, ale tyż podug rachowanio ekologicznego.
Co trzeci bytomianin dowo pozor na to, wiela kosztuje hajcowanie a grzonie chałpy. Jak ze gowom wybiyromy se nasze hajcowanie, to rychtig poradzymy mynij bulić za miyszkanie. A nojlepsze, dlo naszego portmanyja i dlo przirody, je hajcowanie, kere ciśnie do nos rułami. A jake tak naprowdy je grzonie chapłow ze rułow: hajcowanie bez maraszynio się, hajcowanie bez roboty, niy trza kupować ani forantować niczego do hajcowanio (np. wonglo abo drzewa), niy maraszymy luftu przi hajcowaniu, momy w doma ciepło woda i ciepłe kaloryfery, momy grzonie i ciepło woda bez cołki rok, momy cyny konkuryncyjne we 55 proc. Badane bytomiany byliby radzi, jaby mogli zmiynić se hajcowanie ze swoigo pieca na grzonie ze rułow.
Nojbardzij werci sie take ciepło ze rułow, kere łonaczy się we sztromohajcowniach, kaj je doporzondku kogeneracjo, czyli ku społu sie tam hajcuje dlo ciepła i dlo robiynio sztromu. Fest dobro kogeneracjo, czyli łonaczynie po społu grzonio dlo chałpow i robiynio sztromu, to sie rychtig werci. Fest dobro kogeneracjo to na dzisioj dlo polskij energetyki bezmała nojważniyjszo łona.
Coby cołki czas dować grzonie dlo Bytomio, fiyrma Fortum sztyjc dbo o dobre łonaczynie Sztromohajcownie Miechowice. Juzaś przi końcu 2018 roku Fortum sztartnie ze blank nowom, folsztofowom sztromohajcowniom, kero do blank grzonie bez marasu dlo Zobrzo i Bytomio.
Na inwestycjo we sztromohajcowni we bytomskich Miechowicach, fiyrma Fortum yno we 2015 roku wybulyła aże 20 mln złotkow. Sztaluje sie tyż postawiynie blank nowego kotła szczytowego WR-25.
Niyzależnie od funkcjonowanio Sztromohajcownie Miechowice, fiyrma Fortum prziklapła decyzjo o stawianiu we Zobrzu blank nowyj, folsztofowyj sztromohajcownie, co bydzie do kupy razym łonaczyć ciepło do grzonio i sztrom. Blank wszyjsko bydzie wert 870 mln złotkow. Sztaluje sie co tyn nowy werk bydzie fertig we 2018 roku i bydzie rułami dowoł ciepło do kole 70 tysioncow chałpow i miyszkań we Zobrzu i Bytomiu.
Bydzie tyż pociongniynty nowy lajtong, czyli ruły do pociskanio ciepła na Zobrze i Bytom. A we cołkości ruły te bydom duge na kole 10 233 m.
Ta nowo sztromohajcownio dlo Zobrzo i Bytomio, wkludzi tyż nojnowsze a nojbardzij wert tychnologie, kere fest przisztopujom zamaraszanie luftu. Sztaluje sie, co we porownaniu ze starom zobzkom sztromohajcowniom, to aże o 10 razy zmyńszy sie emisjo SO2 i pył we lufcie, a tyż o 3 razy mynij bydzie NOx".
