Piyknie witóm i pozdrowióm! Takech se myśloł uo tyj Unii. Co tyż wto tam uod siebie dokłodo? Niymce – kożdy wiy: piynióndze i porzóndek, Francuzy – wino, Hiszpany – kobiyty, Włochy – śpiyw... I to tak uo kożdym idzie błoznować (żartować).
A co ze tymi, kierzi niydowno do Unii wleźli? Tóż tak: Czechy dały piwo i śmiałość (odwaga we wszystkim, nowatorstwo, nowoczesność, awangardowość), Wyngry – godka (język), kiero kożdy leko zrozumi, Bułgary – szpecjalistki uod ruchu drógowego, Rumuny – szpecjalistów uod nawiónzywanio kontaktów miyndzyludzkich na dworcach, targach i wszyndzie, Słowaki – pierónowe tympo we wszystkim, Słowyńcy – nojlepsze opłaty na autostradach... A Poloki? To tyż kożdy wiy: porzóndek, uczciwość, systymatyczność, robotność i skrómność...
Błozny, błoznami a prowda, prowdóm. Niech se kożdy rozwoży (zastanowi się, wyciągnie wnioski) co je błoznami a co prowdóm.
