Hanysy i Gorole łączcie się w uśmiechu! (16)

Witóm Wos zaś! Ludzie, co sie to wyrobio w tyj polityce. I to za nasze piynióndze! Dyć to już – jak padali starzi ludzie – aże w rzyci szczypi.

Wyboczcie te powiedzónko, ale przi tymu, jak godajóm nasze „elity”, to „rzyć” jest na najwyższym poziomie salonowej konwersacji. A tak po prowdzie, to roztómajte nasze „elity” tak godajóm, że furmón z szewcym po 5 piwach w nojgorszym szynku sprzed jakich 50 lot, zaczyrwiynili by sie razym z włosami.

I to niy ino politycy. Jak se człowiek niyroz posłucho niykierych nauczycieli, kierzi i przi szkolorzach poradzóm zaklónć jak „Zdzicho” na cmyntorzu, to samymu by sie co szpetnego pedziało.

A dziynnikarze i tzw „ludzie kultury”? Kaj wyście wszyscy ta kultura stracili?! Pewnikiym niy było czego tracić. Jo niy godóm, że żech je świynty i niy licza, że inksi bydóm świyntymi, ale to co sie w godce terozki wyrobio, to przechodzi ludzkie pojyncie.

Jo na jednyj wsi – niy powiym kaj, ale daleko uod nos – słyszołech farorza, kiery na żniwnioku godoł z ludziami mnij wiyncyj tak: „Kur..., co się tak pier... z tym obiadem! Ja za chwilę muszę iść odprawiać nieszpory”.

Słowo honoru, że tak było. Niczego nie zmyśliłem. Nojgorsze jest to, że ludzie pomału już sie do tego nabadali (przyzwyczaili) i ich to niy droźni. Już uojcowie z dzieciami tak godajóm. Ale niech żodyn, wto tak robi, niy bydzie mioł potym pretynsji, jak mu cera czy uczyń powiy: „Słuchaj stary...” I tu proszę sobie dopowiedzieć słowa, których tak chętnie, często i łatwo używacie. Wszyscy! Ja czasem też, niestety...