Witóm Wos nojserdecznij, nojgoryncyj i nojpiyknij, jak poradza (potrafię)! Mómy roczek!!! Jutro bydzie gynau (dokładnie). Bez tóż Wóm dziynkuja, coście zy mnóm cołki czas abo ino uod czasu do czasu byli. I Trybunie dziynkuja, że mie u siebie ciyrpi (znosi). Bardzo wiela (dużo) uobchodził (świętował) niy byda, ino se jake piwko wyduldóm (wypiję), abo jeszcze lepiyj winko.
Bo tak po prowdzie niy poradza pedzieć, kiery napitek je bardzij śzlónski. Wszyjscy godajóm, że piwo, ale dyć przeca Karliczek za Karolinkóm szeł z flaszeczkóm wina – do Bogómina przodzi (najpierw), a dziepiyrz (dopiero) z czasym sie to pomiyniyło na Gogolin. Wina na Śzlónsku przed przeszło 600 laty robiyło sie dużo, bo pogody (klimat) były cieplejsze i winogrady dobrze u nos rosły.
Nó ale dyć piwo tyż sie dobre robiyło. Tamtymi czasy nojlepsze było piwo ze Świdnice. Sprzedowali je po cołkim Śzlónsku i we Czechach. Jedyn biskup z ksiónżyncego, śzlónskiygo rodu bez te piwo do Rzymu niy pojechoł, bo je uogrómnie mioł rod (bardzo lubił), a do Italiji by mu go niy wozili. Uón już we Rzymie był, inoś skuli (z powodu) tego piwa stamtónd uciyk i do dóm sie wrócił, a mioł praje (było prawie) pewne, że bydzie papiyżym! To niy sóm błozny (żarty) – to je szczyro prowda! Możecie sie uo tym w ksiónżkach poczytać.
Nó ja. Świdniyckiygo piwa już downo niy ma, to trza (trzeba) sie bydzie inkszego chycić (za inne wziąć). Jedne sie niy zmiynio; tak wtedy, jak terozki ci, kierzi piwo warzóm, majóm z tego dobry profit, a jedni przed drugimi chcieliby nos ze szczewików sebuć (zdjąć nam buty) i z galot seblyc (ze spodni rozebrać). Bez to miarkujcie sie (uważajcie)! Przi urodzinach tyż.
